Kolumna

-Jesi cu?
-Ca?
-Ono da ćeju cint muzeji. Monko tri muzeja.
-To je lipo.
-Ma ca je lipo?
-Boga muzeji.
-Pusti ti ca je to lipo. Oli u Pag nima važnijih stvari za nacint.
-A ca?
-Mogli su nacint kanalizaciju.
-To su već ucinli.
-Pusti ti ca su je ucinli. Mogli su ucint još jednu.

-Ca će nan još jedna?
-Ca ja znan. Rojak, onda si ti, ako te ja dobro razumin, za ti muzeji?
-Jesan.
-E, mujen si. Ca očeš reč da si i za vaj most.
-Jesan.
-Jesi?
-Je.
-Onda si ti popizdi, rojak. Kako moreš bit za vaj most.
-Boga, lipi je.
-Pusti ti ca je lipi. Ca ni boje da su ga na nacinli od lima i stakla kako je bi onaj projekt u vječnicu.
-Ovako je boje. Sad je kaj onaj stari.
-Kaj onaj stari?
-E.
-Da je kaj onaj stari bi bi do Vele ulice.
-Zac bi bi do Vele ulice?
-Jer je onaj stari bi do Vele ulice.
-Ni bi do Vele ulice nego vamoka do pol rive.
-Pusti ti ca je bi do pol rive. Onaj stari most je bi veči.
-Je, bi je veči.
-E, vidiš. Onda ovaj ni kaj onaj.
-Ni.
-E i?
-Ca e i?
-Kako ca e i?
-Boga lipo, ca e i?
-Pa zac ti je onda most lipi kad ni kaj stari.
-Boga, ne more bit kaj stari. Govoriju da je stari most bi visok dvanajst metri.
-E, onda vaj most ni kaj onaj stari.
-Ni, ali je skoro isti.
-Pusti ti to ca je skoro isti. Ma ni isti.
-Ni, ma je lipi.
-Tebi je lipi, meni ni. I ca? Jesu tribali stavjat palme kod kule?
-Palme su lipe.
-Lipe su?
-Jesu.
-Palme?
-E.
-Palme u Pag?
-E.
-Ti jarca rojak, oli si ti ša u njihovu stanku?
-Nisan ja u niku stranku.
-Onda zac su ti palme lipe?
-Boga, jer su mi lipe. Lipo ih je vidit.
-Palme?
-E.
-I ti bi da staviju palme svuda pogradu, je? Misto pitospor, je?
-Kako di.
-Ca kako di?
-Dikod triba ostavit pitospore, a dikod triba stavit palme.
-Palme?
-E.
-Palme u Pag?
-E.
-I ca misliš da ćeju se palme uvatit.
-Nego ca.
-Rojak, ti si meni puno sumnjiv. Ja mislin da si ti ša u njihovu stranku.
-Boga nisan.
-Pusti ti ca nisi. Kako onda moreš reč da ćeju se palme lipo uvatit?
-Boga, jer su se uvatile i na Katine i kod kule. A uvatile su se i one na trajektno pristanište.
-Pusti ti to. One su se uvatile slučajno.
-Kako slučajno?
-Jerbo ni bilo bure.
-Bilo je.
-Ni bilo. Ca ti ono malo ca je puhalo zoveš buron?
-Boga,  raganalo je. Ni puno, ma je raganalo.
-Pusti ti ca je raganalo. Ti šoldi za palme su mogli potrošit u cakod boje?
-Uc?
-Uc? U kanalizaciju.
-Već su ucinli kanalizaciju.
-Neka uciniju još jednu.
-Ca ćeju nan dvi kanalizacije?
-Pusti ti to, boje je imat dvi nego jednu.  A mogli su šoldi potrošit i u cakod drugo ca če bit od koristi.
-Uc?
-Uc?
-E uc?
-Ca e uc?
-Uc su mogli potrošit šoldi?
-Mogli su nacint cakod za omladinu.
-A ca?
-Ca ca?
-Ca su mogli ucint za omladinu?
-Mogli su in poredit dolika kuglanu.
-Dolika niki ne gre.
-Pusti ti to ca niki ne gre. Da se je ucinlo, hodilo bi se.
-Je, hodilo bi se kaj i noga puta kad je sve bilo novo.
-Pusti ti to, da se je ucinlo, hodilo bi se.
-Ma je.
-Bi, bi.
-Ca bi ti hodi dolika?
-Meni je to van ruke, ma bi drugi hodili.
-Čuhaj, rojak, ajmo pošpijat u konobu.
-Ca čemo u konobu?
-Pogedat turnir u briškulu i trešetu.
-Pusti ti turnir. Ca če namin turnir?
-Boga, da se judi malo zabavjaju.
-Pusti ti to da se judi zabavjaju. Ca nisu mogli šoldi od nagrad potrošit u cakod boje.
-Uc?
-Ca uc?
-Boga uc?
-Ca ja znan uc. Ca san ja na vlasti.
-Ala sad mi reci da si i kontra  Kneževoga dvora.
-Pa jesan. I tote je šlo puno šoldov. Ca će nan Knežev dvor? Ca ni moga ostat onako kako je bi?
-Ne. Sad je lipi.
-Lipi?
-E.
-Tebi je ono lipo?
-E.
-Pusti ti ca je to lipo. Makli su one lipe cerene fuge i stavili ove ke se nanki ne vidiju.
-One cerene nisu bile lipe.
-Pusti ti to ca nisu bile lipe. A ca su ove lipe?
-Jesu.
-Jesu?
-Je.
-Ala sad mi reci i da je dobro ca čeju sašivat neku staru robu ku da su Pažani nosili prije petstotin godišč.
-Je, to je dobro.
-Pusti ti ca je to dobro. Ca čen na roba od prije petstotin godišć.
-Liti ćemo je pokazivat turistima.
-Liti čemo je pokazivat?
-E.
-To čemo pokazivat?
-E.
-Pusti ti to ca čeju pokazivat staru robu. A ca nisu mogli šoldi potrošit dikog na drugo misto di bi bilo pametnije?
-Uc?
-Ca uc?
-Uc su mogli potrošit? Nemoj mi samo reč da su mogli potrošit u kanalizaciju.
-A zac si ti tako kontra kanalizacije?
-Ja da san kontra kanalizacije?
-Nego ca. Ti si kontra kanalizacije, rojak.
-Ja san reka da su već nacinli kanalizaciju.
-Pusti ti to ca su već nacinli jednu kanalizaciju, ma  ti si rojak kontra kanalizacije.
-Nisan.
-Jesi. Kontra si.
-Nisan.
-Kako nisi? Uvik kad spomenen kanalizaciju ti receš da su to več ucinli.
-Boga,  jer su je ucinli.
-Pusti ti to ca su već ucinli. Triba ucint još. Rojak, ti si kontra svega.
-Ja da san kontra svega. Boga, ti si kontra svega.
-Ne, ti si kontra svega.
-Ja?
-Nego ca.
-Ja da san kontra svega?
-A vidiš da si kontra kanalizacije.
-Govorin ti da nisan.
-Pusti ti ca ti govoriš. Meni se sve pari da si ti ša u njihovu stranku. Oli i preko tebe ciniju ki kod posal?
-Odi kvragu. Ki ca more cint preko mene?
-Pusti ti to, znan ja da si ti dobar sa onin.
-Sa onin? Sa kin onin?
-Znaš ti dobro ca ja govorin.
-Ne znan.
-Znaš, znaš, ma ciniš fintu da ne znaš. Vidin ja da si ti ša na njihovu bandu.
-Nisan ja ša nidi.
-Pusti ti ca nisi ša nidi. Ma si ša.
-Nisan.
-A zac?
-Ca zac?
-Zac nisi ša u njihovu stranku?
-Zasto ca neču bit nanki u jednu stranku.
-Onda si kontra njih.
-Nisan kontra.
-Pusti ti ca nisi kontra. Nego ca si nego kontra. Ti si kontra svega.
-Rojak, fermaj. Ja gren pošpijat u konobu, a ti kako očeš.
-Pust ti to da kako ja oču. Znan ja zac ti greš gorika.
-Zac gren gorika?
-Pusti ti to, znaš ti dobro.
-Znan.
-E vidiš.
-Gren da se malo zabavin.
-Pusti ti to da se malo zabaviš. E, meni češ ti govorit. Meni, e pusti ti to. Koda ja ne znan.
-I ne greš smanon?
-Ne.
-Ali paričat čeju lipe friške manulice.
-Pusti ti lipe friške manulice.  
-Ca ne voliš manulice?
-Ke manulice?
-Ma je ti mene čuhaš. Paričat ćeju manulice.
-Manulice?
-E.
-Pa ca mi to nisi reka?
-Reka san ti.
-Pusti ti ca si mi to reka. Da si mi reka bi bi cu. Sad zadešpet gren u konobu jer mi nisi reka.
-Boga, rojak, kako si mujen.
-Pusti ti ca san ja mujen. Ti si sti poč na manulice bezmene.
-Nisan.
-Jesi.
-Nisan.
-Pusti ti ca nisi. Ala, ajmo.
-Ala.