-Jesi cu?

-Ca?

-Ono ca su govorili dolika na rivu.

-Nisan.

-Nisi?

-Ne.

-Oli si ti jedan od njih?

-Nisan.

-A onda za koga si ti ako ciniš fintu da nisi cu?

-Kako za koga san ja. Oli ne znaš?

-A ca ja znan?

-Boga, znaš. Mi smo na istu bandu.

-Jesmo?

-Je, ako si ti na onu bandu na ku san i ja.

-A na ku si ti?

-Boga, a na ku si ti?

-Gej njega, da na ku. Na onu, ca ti moran sve ovdika na pjacu govorit? Znaš da i zidi imaju uši.

-Onda nisi ša kod njih?

-Ma je, ca si mujen. Oni su svi napak.

-To i ja govorin. A skima je onaj dolika?

-Ki?

-Onaj dolika na kraj Vele ulice.

-On je s njiman.

-Je? Cera smo čakulali, svega san govori, a on in je sigurno to reka.

-A nego ca.

-A kako je on s njima, a?

-Ca ja znan. Skuvali su ga.

-A ca njemu ni svojta s onima?

-Je, ali su se pokarali. Sad je ovaj s ovima, a oni su sa onima.

-A ona?

-Ka ona?

-Ona, ona njegova.

-Ona je s onima.

-Sa onima dolika?

-E.

-Pa ca cini sa onima?

-Ki bi to zna.

-O oni namo odonuda?

-Odkuda?

-Boga, odonuda.

-A oni. E, ovih dan ih ni bilo cut.

-Onda nešto parićivaju.

-Neka parićivaju. Mene više smitaju oni namo.

-Ki oni namo?

-Boga, oni na drugu bandu.

-A oni. A ca i oni cakod parićivaju?

-A ca su kad fermali?

-Meni se je parilo da su fermali. Onoga nisan dugo vidi.

-Koga onoga?

-Boga, onoga, onoga namo.

-A onoga. Ja san ga cera vidi. A znaš s kin?

-S kin?

-Sa onin.

-Skin onin?

-Boga, onin namo dolika.

-Aaa s njin.

-Onda je i on snjiman, a?

-Pari se da je. Prije je bi kod onih, a sad je ša kod ovih.

-E.

-Puno toga ti znaš, rojak. Ti si meni malo sumnjiv.

-Boga, ja da san mu sumnjiv. Ja da sam mu sumnjiv.

-E, jesi malo, jesi.

-Bilo bi ti boje da ti je sumnjiv onaj tvoj sused.

-Sused?

-E.

-Ki sused?

-Boga, onaj.

-Onaj?

-E.

-Onaj mujenjak?

-E.

-Je? A zac bi mi on triba bit sumnjiv?

-Ne znan ja. To pitaj okolo.

-Koga? Njih ili onih? Ili onih dolika?

-Pitaj koga očeš. U tim stvarima to ti je sve isto.

-Ca očeš reč da je sve isto?

-Oču reč da svi znaju.

-Je, a ca znaju?

-Boga, da ti sused gre doma kod žene.

-Odi kvragu rojak, a zac če onaj mujenjak hodit kod nje?

-Neću ja niš govorit. Da potli ja buden kriv kad se vi pomirite.

-Un ti, sad san ti sti reč, znaš. Ki da se pomiri?

-Ti i tvoja žena.

-Ca čemo se pomirit kad se nismo ni posvadili.

-Znan, ma govorin ti da čete se morebit posvadit ako ti recen vo ca me pitaš. Potli ćete se pomirit i onda ću ja ispast kriv, a ja ni kriv ni dužan.

-Cekaj, cekaj. Ako bi ti meni reka zac on gre kod nje onda bi se ja snjon posvadi. Je?

-Ma to ti govorin ka recimo jednu recimo pretpostavku.

-On je sonima namo, a?

-E.

-I gre kod nje?

-E.

-Razumi san.

-E i?

-Ca e i?

-Boga, i ca govoriš?

-A mislin se.

-Ca se misliš?

-Da to morebit ni istina.

-Morebit ni, ma ja mislin da je.

-A di če ona poč s njin da se to ne zna?

-Kodtebe doma.

-Kodmene doma?

-E.

-Kako kodmene doma?

-Boga, kad pojdeš na lignje on dojde kod nje.

-Ma ja gren na lignje vecer kasno? Ca onda dojde?

-E.

-Svaku vecer?

-Svaku vecer kad je bonaca.

-Zac kad je bonaca?

-Jer ti onda greš na lignje.

-Mmmmm, ma jesi vidi, a? On gre kod nje kad mene nima doba. Enti, boje da mucin. Znaš da si me najuti.

-Zna san da ćeš se najutit. I ja bi se najuti.

-Dobro si mi vo reka, sad mi se je prosvitlilo.

-Je?

-Je.

-Ca ti se je prosvitlilo?

-To je onaj moj mujeni sused puni možjani da pojde sa onima dolika.

-Ne znan ja ca on njoj puni, ma gre kod nje.

-Luda. Čuha onoga mujenoga suseda. Za ne poverovat.

-Mujen ili ni, ali ima on snage, more dobro potegnut i zagruncit se.

-Znan.

-Znaš?

-A znan.

-Kako znaš?

-Vidi sam kako drci namo do Starogagrada.

-Nisan na to misli.

-Ne? Nego ca si misli?

-A niš, ca ču mislit? Samo ti govorin da su vecer zajno.

-To znaš siguro?

-E.

-Svaku vecer kad ja pojden na lignje, govoriš?

-E.

-Onda on nju po celu noć mami kod njih dolika.

-Boga, ne znan ja je je mami kod njih dolika oli cakod drugo ciniju u komoru.

-U komoru?

-E.

-Nisu u kužinu?

-Ne. U komoru su.

-To si ti špija?

-Nisan špija nego kad ti pojdeš na lignje ja napravim đir po ulici pa vidin.

-U komoru govoriš?

-E.

-Ma baš u komoru?

-E.

-Onda je to da tako recen uzelo maha.

-Pari se da je. To ti traje od devetoga miseca. Vo je sad kraj jedanaestoga pa ti racunaj.

-A ona meni niš, nanki besedu.

-U ime Oca i Sina i Duha Svetoga Amen. Oli će ti to govorit?

-Morala bi mi reč. Žena mi je.

-Pa ca se o tomu govori?

-Bi bi red.

-To još nisan cu.

-Ca nisi cu?

-Da će ti žena reč ca u komoru cini sa susedom.

-Morala bi.

-A ne znan, ali da san na tvoje misto ja bi se zamisli.

-I znaš da san se zamisli.

-I triba. Znaš od ke je ona race.

-A znan.

-E.

-A kako oni znaju da se ja nisan ranije torna i da ih neću uvatit?

-Na rivu mu stoji rojak i kad te vidi drci u ulicu i iti kamencič u barkun.

-Enti, ka je to organizacija, a? Jesi vidi?

-Je, vidi sam.

-Ca oni sve moreju ucint, a?

-E.

-I to sve znaš i nisi mi reka.

-Boga, govorin ti.

-Moj mujeni sused nagovara moju ženu da gre snjiman. Ma zamisli ti to, a? Ka je to porkarija.

-Ja nisan reka da je on nagovara.

-Ajme, rojak, kako si ti naivan. A zac onda gre kod nje?

-Ne znan ja niš, ali san cu kako ona žiše kad su u komoru.

-Žiše?

-Žiše.

-Puno žiše?

-Je, ka sipa.

-To je on onda straši.

-A, ako ti to tako zoveš onda je straši.

-I ca govoriš da nacinin?

-A ca ja znan? To već dugo traje pa ne bi bilo dobro naglo, razumiš. Znaš ke je ona race?

-A znan.

-Onda moraš lipo polako.

-Zac?

-A čuhaj, boje je lipo polako, pa jedno vrime ne hodi na lignje, pa je daj malo kuraja, malo je poščipji. Razumiš?

-Ja bi na naglo, odma u facu da mi sve rece.

-Ne, ca si mujen. Prestrašit ćeš je i klet če se da ni niš nacinla.

-Onda da gren polako?

-E.

-Da je lipo okolo nakolo pitan, a?

-E.

-I onda če mi reć?

-A čuhaj, ako vidi da češ je oprostit, reče ti cakog. Neće ti reć sve, ali malo će ti reč. Lipo je onda zagrlij, bušni i reci da se to svakomu more dogodit i da ćete lipo nastavit daje zajno. Ona če malo pustit suzu, a ti je odma u postiju.

-Dobro govoriš. Boje je polako.

-E.

-Onda ću ucint tako. I to odma veceras. Znaš, sti san poć na lignje, a iti san i parangalić, ali ne gren nidi.

-E.

-Ispitat ću ja nju. Reče ona meni.

-A provaj.

-Ma zamisli ti, a?

-A jadan ti, ca ču ti reć.

-Jadan? Ja jadan? Ajme rojak kako si ti naivan. Ka dite. Ja ću to fermat.

-Ca češ fermat?

-Da ona pojde s njima.

-Skima?

-Sa onima namo dolika.

-A ne snjin?

-Skin?

-Boga, sa susedon.

-Snjin? On više neče doč u kuću. Ni cukar mu za kafu više neću davat. A samo neka mi dojde blizu, žigericu ću mu izvadit.

-E, bravo.

-Ma da će on nju mamit? Ma zamisli ti to?

-Morebit je ne mami. Di su muški i ženska vrag zna ki koga mami.

-Ajme kako si ti naivan rojak. Nego ca nego je mami. Koda ja neznan. I to je mami dok je u moju komoru! I to vecer! Ma ka porkarija, a?

-A, ako ti tako govoriš.

-Gren ča, ne mogu više, svas san kuvan.

-Odi, ali sve lipo polako kako san ti reka.

-Ma zamisli, on nju vecer u moju komoru, u moju komoru…

-E, u tvoju komoru.

-I mami je da gre snjiman.

-To nisan reka.

-Pa ca je ona poludila. Oli ne zna da san ja sa onima drugima. I ca, neka se to otkrije, a? Kako ću ja judima pogedat u oci i reč in da nisam ja snjima nego da je moja žena s njima. Razumiš me?

-A…

-Ala bog, gren ča doma i sve ću doznat.

-E.

-Ma zamisli cuda. Ona da će snjiman, a  ne sa mojima. E, sad more reč adijo lignje. Neka pati.

-Morebit neče toliko patit radi liganj.

-A zac če onda patit?

-A ca ja znan.

-Oče, oče, patit če. Ne znaš ti kako ona voli lignje. Svaki dan me nagovara da gren lovit. Ali neču poč na lignje do febrara.

-Ne bi triba poč ni u febraru.

-Zac?

-Opet će on doć.

-Ki?

-Boga, sused.

-E oče on doč znaš di, da ovde ne grišin dušu. Neće on više doć, a ako dojde ona če ga prva potirat.

-Ona če ga potirat?

-E, nego ca. Okrenut ću ja nju na našu bandu. Opet če ona bit snanim, čuhaj ca ti govorin.

-Čuhan, samo…

-Pusti ti to meni. Čita san ja knjige kako se ispireju možjani. Enti jarca, isprat ću je možjani da će plizat oko mene i navijat za moju bandu. Od veceras ću je svaki dan, od jutra do prije spanja govorit ka je prava banda. Razumiš?

-Aaa…

-Ala bog.

-A jesi siguran da si sve dobro povača?

-Nego ca. Sve san razumi. Ala bog.

-Ala bog.

-Neće ona meni na drugu bandu, a ne…